Pagabutangan sang price monitoring committee sa tagsa ka mga merkado sa ciudad sang Bacolod agud istrikto nga mabantayan ang presyo sang bugas nga ginapatuman sang retailers.
Suno kay Councilor Celia Flor chairman sang Committee on Markets sa Sangguniang Panlungsod sang Bacolod, ginbaligyaan sang ciudad ang mga retailers sang tatlo ka dalagko nga merkado sa ciudad nga ginalakipan sang Burgos Public Market, Libertad Public Market, kag Central Public Market, sang tag P42 nga kilo sang bugas ukon P2,100 kada sako kag ini ibaligya sa merkado sa presyo nga P45 ukon P2,250 sa kada sako para nga makaginansya sang tag P3 sa kada kilo ukon P150 sa kada sako ang mga retailers.
Suno sa konsehal, maayo man ang kalidad sang bugas naggikan sa ciudad.
Naintindihan man sini nga indi mahapos para sa mga ratailers ang gilayon nga pagsunod sang Executive Order No. 39 nga pagpatuman sa price ceiling sang bugas.
Samtang, pahayag ni Flor ang tag P45 nga kilo sang bugas nga mabaligya sa merkado ang para sa mga pumuluyo nga sila makasarang nga makabakal sang barato apang wala naman sang dako nga pagbag-o gid sa baklanay bangod may yara sa gihapon sang nagabakal sang mahal nga bugas.
Sa karun ang presyo sang bugas sa merkado nagadangat sa P44 tubtob P60 sa kada kilo.
