Ginpirmahan na ni acting mayor kag Bacolod City Councilor Thaddy Sayson ang Executive Order No. 022 Series of 2023 nga nagamandu sang paghatag sang cash indemnification para sa mga hog raisers nga apektado sang African Swine Fever (ASF).
Santo sa EO, ang hog raisers ang makabaton sang financial assistance depende sa kung ano nga sahi sang baboy ang ila ginsagod nga nalatnan sang ASF.
Ang mga nagasagod sang idik nga naga-edad tatlo ka bulan panubo ang makabaton sang P3,000 kada isa; P5,000 naman sa fattening pigs ukon mga naga-edad apat tubtob lima ka bulan; samtang P7,000 naman sa kada breeder ukon nayon.
Gin-athag naman ni Acting Mayor kag Councilor Thaddy Sayson nga ang mga i-culling lamang nga baboy ukon ang mga piliton patyon bangud yara sa 500 meter radius ang bayaran kag indi ang mga nagkalamatay na nga daan baboy.
Suno diri, kapin P11 million ang ginpreparar sang ciudad lakip na ang equipments kun sa diin P10 million diri ang para sa cash indemnification sang mga apektado ga hog raisers.// Ang pondo ang pagakuhaon sa city disaster preparedness fund sang ciudad.
Agud maka-avail sini, dapat magpakita sang disease investigation report nagikan sa City Veterinarian Office ang hog raiser, laboratory result kag Bureau of Animal Industry Confirmation nga naka-address sa regional director agud mapatihan nga may ASF ang ila baboy.
Dapat man nga may yara sag ASF Indemnification Claim Form kag ASF Consolidated Depopulation Form para sa kada barangay para sa validation sang culling.
Kinahanglan nga magpadala ang hog raiser sang letter of request para sa indemnification kag naka-attach ang mga nauna nga nasambit nga dokumento.
Magapasa man sang Affidavit of Undertaking nga nagapakita nga ang hog raiser ang magacomply sa Department of Agriculture Administrative Order No. 07 series of 2001 nga nagahatag sang guidelines para sa “Bantay ASF sa Barangay” Program partikular na sa guidelies sa recovery kag repopulation.
Dapat nga ipasa ang nasambit nga mga dokumento sa City Mayor’s Office agud icollate kag ireview.
Kun naaprubrahan na ang application, igarelease na ang financial grants.
Ginaengganyo naman sang konsehal ang mga hog raisers nga magparehistro sa barangay agud nga kun may ASF sa area, mas mahapos ini mamonitor kag may head count na sang baboy sa ciudad.
