Ginpahayag ni Bacolod City Vice Mayor El Cid Familiaran, nga sa karun nagapungko bilang Acting Mayor sa ciudad nga iduso sini sa konseho ang paghimo sang resolusyon nga ipadala sa National Government sa panawagan nga i-review ang public utility vehicle (PUV) Modernization Program.
Madumduman nga nakigsapol si Familiaran kahapon sa pamunuan sang Bacolod Alliance For Commuters Operators & Driver’s Incorporated (BACOD) kadungan sa ginpatigayon nga rally protesta sang transport group.
Suno sa bise alkalde, ang demand sang mga ini ang nagapabilin nga pagbalabag sa pagphase out sa mga traditional jeepneys, pagbalik sang lima ka tuig nga prangkisa kag pagpamatok sa consolidation sa mga kooperatiba ukon korporasyon.
Ginaduso sang mga ini nga pahanugutan ang individual franchise.
Nagapati man ini nga ang mga nasambitan nga request ang nalakip naman sa gin-apelar sa Korte Suprema nga Temporary Restraining Order (TRO) sa franchise consolidation requirement nga tubtob na lamang bwas, Desyembre 31.
Sa pihak nga bahin, ang mga unconsolidated unit ang ginhatagan pa sang tubtob Enero 31 nga makabyahe, bilang grace period para sa pagproseso sang consolidation.
Apang sa paglantaw ni Familiaran, ang consolidation ang ginpatuman lamang agud mahapos para sa gobyerno ang paghatag sang financial assistance kasubong man ang payment sa loan gikan sa Land Bank kag Development Bank of the Philippines (DBP).
Nakita sang bise alkalde nga may ponto man ang panawagan sang transport group, kalakip na ang hingyo sang mga ini sa Department of Transportation (DOTr) nga sila ang hatagan lamang sang specs sa engine, chassis, kadakuon, seating capacity kag ventilation sang salakyan agud mahatagan sang kahigayunan ang mga local manufacturers nga makapasad sang bag-o nga salakyan.
Ginalantaw man sang mga ini nga dako ang masave sa kaangay nga pamaagi.
Sa karun, ginahulat pa ang sabat sang Korte Suprema sa appeal, apang ang magapadala naman sang resolusyon sa National Government, nga mareview ang programa.
Paathag ni Familiaran nga amo na lamang ang mahimo sang City Government bangod national government ang nagapatuman sang modernization program.
Suno diri nga sa record, 65 porsyento pa sang mga traditional jeepneys ang wala nakapaconsolidate.
