Magapatigayon ang Bacolod City government sang Swiss challenge agud matumod kun sin-o ang luyag nga maghangkat sa Shoemart sa pagdevelop sang Manokan Country.
Sang damlag lang, nagtanyag ang SM nga idevelop ang Manokan Country tubtub sa BAYS Center sa balor nga P4.5 billion apang ipaagi ini sa public private partnership.
Suno kay Bacolod City Councilor Jude Thaddeus Sayson, chairperson sang committee on finance sa Sangguniang Panlungsod, may tanyag ang Shoemart nga sila ang madevelop sang property paagi sa PPP kag ginbaton na sang committee ang offer.
May pila naman ka negosasyon nga ginpatigayon angot sa desinyo kag rentals gani maga-proceed na sa Swiss Challenge.
Sa karon, ongoing ang construction sang Normal University sa tupad sang mall samtang magapatindog man sang BPO building sa parking lot sang Vendors Plaza.
Suno kay Sayson, naghingyo sila sa developer nga hatagan sang prayoridad sa kitchen area ang yara na nga daan nagarenta sa Manokan Country agud nga may yara sila gihapon sang negosyo.
Suno sa konsehal, may market na ang mga restaurant kun may call center agents kag mga estudyante.
Sa tion nga may challenger paagi sa Swiss challenge, dapat nga malapawan sini ang tanyag sang SM apang kun mag-expire na ang deadline kag wala sang magachallenge, magakadto na ini sa developer.
