Magaprotesta ang ciudad sang Bacolod sa ginpagwa nga mando sang national interagency task force nga ang mga returning overseas Filipino (ROF) nga may negative nga RT-PCR test result ang papulion na lang sa ila mga puluy-an kag indi na pag-ipaidalum sa swab test.
Sa interview sang Bombo Radyo kay Mayor Evelio “Bing” Leonardia, ginpahayag sini nga magaprotesta sila sa nasambit nga mando bangud naagyan na ini sang ciudad sang una kag dako gid ang chansa nga makalusot ang virus sa mga ROF.
Suno kay Leonardia, nag-apelar man sila sang tinalikdan sa national IATF sang moratorium sa pagpasulod sang mga LSI kag ROF para sa bulan sang Setyembre apang wala ini gin-aprubahan.
Sa karun suno sa iya, mas naglain na gid ang ginpagwa nga polisa kag lauman nga mas mangin mabudlay ang sitwasyon sa ciudad.
Suno sa alkalde, magahatag sang dugang nga ulubrahaon kag pressure sa mga opisyales sang barangay kag barangay health emergency response team (BHERTS) bangud kun pabay-an lang ang mga ROF sa ila mga panimalay, indi mabal-an kun nagasunod gid man ang mga ini sa protocols.
Gani, nagahingyo ini sang kooperasyon kag pagbinuligay sa mga pumuluyo sa pagpakigbato sa coronavirus kag nagpahanumdum nga indi na magpasaway.
Ginpakigbahin man sang alkalde ang impormasyon nagikan kay Congressman Albee Benitez nga sa 4,384 ka mga persona nga nagpaidalum sa mass testing, masobra 1,000 na ang nagwa ang resulta kun sa diin 14% diri ang positibo sa COVID-19.
Suno kay Leonardia, apisar nga madamo nga mga pumuluyo ang magwa nga positibo sa mass testing, mas maayo na lang nga nahibaluan nga infected ini sang sa madamo ang positibo apang wala sang may nakahibalo.
