Ginkumpirmar sang chairman sang inter-agency task force against coronavirus sa ciudad sang Bacolod nga pagasuportahan sini ang ano man nga protocol nga iimpose sang provincial government angot sa pagbalik sang sea travel.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga pagasundon kag suportahan sang ciudad ang mga health protocols nga ipatuman ni Governor Eugenio Jose “Bong” Lacson kun magpanumbalik na ang biyahe sang fastcraft.
Nahibaluan nga posible magresume na ang byahe sang mga ini sa Hunyo 8.
Suno kay Familiaran, ginahulat pa sa karon sang mga shipping lines ang special permit nagikan sa Maritime Industry Authority (MARINA) agud nga makabiyahe.
Dugang pa sini, dapat sundon sang mga ini ang protocols nga ipagwa sang local government unit (LGU) kaangay na lamang sang pagpahibalo kun pila ka pasahero ang maabot kag kun taga-diin ang mga ini.
Ginkumpirmar man ni Familiaran nga kinahanglan ipaidalom sa swab test ang mga magaabot nga pasahero.
Suno sa bise alkalde, ang mga naghalin sa Iloilo ang pwede nga maka-home quarantine apang kinahanglan nga butangan sang notice ang balay sini agud mahapos imonitor sang Barangay Health Emergency Response Team (BHERTS).
Samtang, ang mga nagikan naman sa mga high risk areas kaangay sang Cebu kag Manila ang kinahanglan gid ibutang sa quarantine facility.
