All set na ang syudad sang Bacolod sa pagpatigayon sang Nobyembre 29 tubtob Desyembre 1 nga National Vaccination Days nga natalana pagabuksan sa 40 ka mga vaccination sites kalakip na sa mga eskwelahan, barangay kag mga malls.
Ang tatlo ka adlaw nga kampanya ang kabahin sa kampanya sang gobyerno nga mapadasig ang paglab-ot sa herd immunity.
Ginapanugyan naman ni Bacolod City Mayor Evelio “Bing” Leonardia sa mga unvaccinated nga Bacolodnon nga makigbahin sa programa humalin subong nga Lunes tubtob sa Miyerkules apisar pa sa makita nga pagnubo sang COVID-19 cases sa syudad.
Ginpahayag man ni Em Legaspi-Ang, Executive Director sa Emergency Operations Center-Task Force nga ang City Health Office sa idalum sang officer-in-charge nga si Dr. Edwin Miraflor Jr., ang nagpatigayon na sang orientation sa 127 ka mga volunteers sa programa nga maga-umpisa alas-8:00 subong nga aga.
Ang vaccination team sang lokal nga gobyerno ang ginabug-usan sang health screener, vaccinators, post-vaccination monitors, registration personnel, encoders, data consolidators ukon talliers kag health educators.
Si Ang nga amo man ang coordinator sa COVID-19 Vaccination Council ang nagpahayag nga masobra isa ka gatos nga volunteers ang nagpirma nga magabulig sa syudad sa pagpakig-isa sa National Vaccination Drive.
Ginpasalamatan man ni Ang ang mga volunteers nga nagstep-up kag nagsugot nga magserbe sa COVID-19 vaccination.
Suno kay Dr Miraflor, ang target nga ginhatag sang Department of Health (DOH) sa Bacolod City nga mabakunahan ang nagdangat sa 66,000.
Aminado naman si Ang nga tuman ka taas ang target sang syudad apang nagpasalig man ini sa DOH nga himuon sang Bacolod City ang masarangan agud makabakuna sang madamo sa tatlo ka adlaw.
Bilang kabahin sang preparasyon, ang EOC vaccination team ang nakigsapol na sa Manager sang SM City Bacolod sang nakaligad nga semana.
