Nag-apelar si Bacolod City Administrator Em Ang sa mga market vendors nga magkooperar sa patigayunon nga libre nga swab testing sa mga manugbaligya sa tatlo ka dalagko nga merkado publiko sa ciudad nga mahimo suguran sa masunod nga inadlaw.
Sa interview sang Bombo Radyo kay Ang, ginpahayag sini nga ang merkado ang isa ka lugar kun sa diin masami nga ginakadtuan sang madamo nga mga tawo.
Suno diri, apisar nga napaidalom sa modified enhanced community quarantine (MEC) ang Bacolod, nagapabilin ini nga bukas bangud ang pagkaon ang vital nga kinahanglanon sang isa ka persona.
Bangud diri suno sa konsehal, indi malikawan nga makaclose contact ang mga vendors sa madamo kag nagkalain-lain nga mga tawo gani kinahanglan ang mga ini nga maproteksyunan subong man ang ila pamilya kag ang publiko nga nagabakal sa merkado.
Suno sa iya, ang patigayunon nga swab testing ang para man sa kamayuhan sang tanan kag nagakadapat nga matest ang bilog nga merkado agud mahibaluan kun diin ang infections kag maisolate ang mga ini.
Suno sa iya, kun indi magpatigayon sang test, padayon sila nga mangin malapit sa mga pumuluyo kag posible nga may malatnan sang balatian nga wala nila mahibaluan.
Suno diri, kun matigayon ang full testing kag ma-isolate na ang mga spreader sang virus, indi na sila maka-infect sa iban nga tawo, magadiutay na ang kaso kag maabrehan ang ekonomiya.
Suno kay Ang, kun matumod na ang positibo sa virus, i-isolate ini bangud matapos ang 14 adlaw, madula naman ang virus.
