Nagapadayon ang pagbatun sang Bacolod City sa mga nagapauli nga overseas Filipino workers (OFWs).
Suno kay Councilor Israel “Ising” Salanga, chairman sang Action Team on Returning OFWs, ginpahanugutan ang padayun nga pagbatun sang mga OFW kag returning overseas Filipinos (ROF) indi kaangay sang mga locally stranded individuals (LSI) nga ginhatagan sang moratorium sang tinalikdan.
Ginpahanugutan ang mga ini bangod indi kaangay sang mga LSI nga may matiniran kag makadtuan pa, ang mga OFW ang wala na sang matiniran sa tion nga madulaan sang trabaho sa luwas sang pungsod.
Ginapatigayon ang swab test pinaagi sa OWWA Health Desk nga yara sa NAIA airport.
Igaquarantine naman ang mga ini kag kun magnegatibo sa RT-PCR test, gilayon naman ang mga OFW nga ginaschedule sa pagsakay sa sweeper flight.
Samtang ginapasalig naman ni Salanga nga ginasunod sang ciudad ang guidelines nagikan sa national IATF.
Pag-abot sang mga OFW sa ciudad, wala na sila ginapaidalum liwat sa swab test kag ginarekomendar nalang nga magpaidalum sa quarantine.
Ginseguro naman sang ciudad nga negatibo sa COVID-19 ang mga pumuluyo nga nagapauli kag ginadul-ong sa mga panimalay kun wala sang sugat samtang hugot naman nga ginapahanumdom kun ano ang dapat nga himuon kun nagpaidalum sa home quarantine.
Dugang pa sini nga kun may matukiban nga may sintomas ang isa ka pasahero, ginadala ini gilayon sa mga eskwelahan nga ginhimu nga isolation facility.
Nag-untat naman sa pagsabat sa hotel accommodation ang OWWA matapos sang mando nga indi na ini kinahanglan sa mga OFW.
Samtang sa mga personal naman nga luyag nga magpaidalum sa isolation sa hotel sa personal nga gasto, nagapanugyan naman ang ciudad sang isa lang ka hotel kag ini ang pagabutangan sang mga nurse nga magamonitor.
