Ginahulat pa sang local government unit sang Bacolod ang ipagwa nga direktiba sang presidente subong nga adlaw angot sa pagbatak sang modified general community quarantine sa syudad.
Sa interview sang Bombo Radyo Bacolod kay Vice Mayor El Cid Familiaran, chairman sang Inter-agency task force, ginpahayag sini nga ginalauman na niya nga mas pahalugan ang pagsulundan sa palaabuton nga Hunyo 16 bangud magabalik na ang commercial flights kag commercial trips sang barko.
Kadungan sini ginalauman na ang pagdinaguso sang mga locally stranded individuals kag mga tawo nga may importante nga kinahanglan sa ciudad.
Ginpahayag man ni Familiaran nga sa subong nga adlaw may yara man sang paghinun-anon sa tunga ni Mayor Evelio Leonardia kag mga Punong Barangay agud pabakuron pa ang mga Barangay Health Emergency Response Team (BHERTs) agud mabantayan ang mga naga-alalabot nga mga LSIs bangud overwhelmed na ang mga quarantine centers.
Bilang pagpanghanda, ginmanduan sang alkalde ang city engineer’s office nga ang tanan nga mga eskwelahan nga mahimo pa gamiton nga quarantine centers ang ihanda na lamang sang mga ini bangud ginalauman na ang madamo nga maalalabot nga LSIs kag mga repatriated OFWs sa pagbalik sang commercial flights kag sea travel.
Wala man sang problema sa pondo bangud nangin makinot ang alkalde sa paggasto sini kay ginlantaw na sini nga madugayan antes magtahaw ang coronavirus.
Ginkompirmar man ni Familiaran nga nakahambalanay na sang Sabado si Leonardia, anay 3rd District Congressman Albie Benitez, Governor Eugenio Jose “Bong” Lacson kaupod ang DOH Region 6 nga mahimo na sang syudad ipadala sa Molecular Bio Laboratory sa Teresita Locsin Jalandoni Provincial Hospital (TLJPH) ang mga swab specimens samtang ginahulat nga maka-operate ang Corazon Locsin Montelibano Memorial Regional Hospital Biosafety laboratory.
