Ginpaathag ni Bacolod City Mayor Evelio “Bing” Leonardia nga indi pa maka-giho ang city government bangud ginahulat pa nila ang guidelines sang modified general community quarantine nagikan sa national inter-agency task force (IATF).
Sa interview sang Bombo Radyo Bacolod kay Leonardia, nagalaom ini anga maintindihan sang pumuluyo nga nagahulat pa sila sang pagsulundan nagikan sa IATF matapos ang mga ini nagkambyo sa pagdeklarar sa mga low-risk areas nga ipaidalom sa MGCQ.
Suno sa alkalde, apisar wala pa ang guidelines, may yara na sila sang strategy nga ginapaminsar agud amat-amat nga makakas ang mga restrictions kag masunod na ang new normal.
Ginpahayag man sini nga pananglitan makapagwa na sang guidelines ang IATF, gamiton nila ang duha ka semana nga pagpaidalom sa MGCQ agud nga makadihon sang mga ordinance agud nga mangin permanente na ang mga health protocols nga ginasunod karon sang ciudad.
Kaangay na lamang sang pagsuksok sang facemask, pag-obserbar sang social distancing kag curfew.
Kahapon, pila ka mga probinsya kag ciudad nga una na gin-characterize bilang low-risk areas ang ginpaidalom sa modified general community quarantine kalakip na ang ciudad sang Bacolod kag probinsya sang Negros Occidental.
Sa media briefing nga ginpatigayon sa Malakanyang kaina sang aga, gin-anunsyar ni Presidential Spokesperson Harry Roque nga tanan nga mga areas sa Pilipinas ang yara sa gihapon sa idalom sang quarantine bangud ang nauna nga mga areas nga gin-anunsyar nga wala na sa community quarantine ang ginbalik sa idalom sang modified GCQ.
Madumduman nga gin-anunsyar ni Roque nga ang mga lugar nga nacharacterize nga low risk ang indi na pag-ipaidalom sa community quarantine sugod sa Mayo 16.
Sa idalom sang modified GCQ, ang movement ang mas relaxed na kag pahanugutan naman ang mga empleyado nga magbalik sa non-essential jobs samtang nagapractice sang sang minimum health standards kaangay sang pagsuksok sang face mask sa pampubliko nga lugar, mag-obserbar sang physical distancing kag masami gid nga maghugas sang kamot kag magdisinfect.
Suno kay DILG Secretary Eduardo Año, madamo ang mga alkalde kag gobernador nga nagrequest sa iya nga indi pagbawion gilayon ang GCQ kundi amat-amaton lang ang pagbalik sa new normal.
