Ginsiguro sang Bacolod City Government sa pagpamuno ni Bacolod City Mayor Greg Gasataya nga indi maapektuhan ang pagkolekta sang basura sa ciudad apisar nga padayon nga ginadiskusyunan ang bayolasyon sang ciudad sa indi pagkuha sang Environmental Compliance Certificate (ECC) para sa duha ka cell sa sanitary landfill sa Barangay Felisa, Bacolod City.
Madumduman sang tinalikdan nga may yara sang ginpatigayon nga public hearing para sa ECC sang cell number 4 kag didto man gintalakay kun ano na ang naubra sang ciudad para sa pagkuha sang ECC
Kahapon, ginpresentar man sa pressconference kun ano ang ginpresentar sa public hearing agud makahibalo ang publiko ang natabo.
Sa interview kay Bacolod City Administrator Atty. Mark Mayo, ang mando ni Mayor Greg nga unahon gid ang welfare sang mga pumuluyo kag likawan nga makahatag risgo sa mga pumuluyo.
Suno kay Mayo padayon ang pagkolekta sang basura kag padayon ang pagmanage sang sanitary landfill samtang ginahulat pa ang opisyal nga desisyon sang Environmental Management Bureau (EMB)-Negros Island Region.
Madumduman sang tinalikdan gindagdagan ang City Government of Bacolod sang duha ka notice of violation bangud sa wala pagcomply sa ECC kag gina-alegar tagas gikan sa sanitary landfill padulong sa suba nga sakop sang Barangay Felisa.
Nagpasa naman ang ciudad sang position letter angot sa duha ka notice of violation kag pagatumuron pa sang EMB NIR kun sila ang dagdagan sang penalidad.
Suno kay Mayo sa position letter ginkwestyon nila ngaa ang City Government lamang ang gindagdagan sang Notice of Violation kag wala gindagdagan ang IPM CDC nga amo ang nag-manage diri.
