Nagsulat ang city government sang Bacolod sa Bacolod City Police Office agud mangayo sang bulig nga matapna ang kinawatay sang lapida sa sulod sang Bacolod North Public Cemetery sa dalan Burgos.
Ini ang kasunod sang report nga pila ka marmol nga lapida sa sulod sang Burgos Cemetery ang ginkawat kag wala pa sang natumod nga suspetsado.
Suno kay Bacolod City Administrator Atty. Joseph Eduard Cuansing, makahalangawa ang kinawatay sa sulod sang Burgos Cemetery kag nagsulat na sa iya ang pinuno sang General Services Office angot diri.
Suno kay Cuansing, kinahanglan na gid ang bulig sang Bacolod Police Station 4 agud makontrol ang kinawatay sa patyo bangud wala man sang gwardiya diri kun gab-i.
Ginalantaw sang GSO nga gab-i nagaluntad ang kinawatay.
Suno kay Cuansing, nagsulat sila kay BCPO director Police Col. Thomas Joseph Martir subong nga adlaw agud hingyuon ang assistance sang Police Station 4 sa pagbantay sa patyo.
Ginhingyo man ang pagbantay sang mga pulis sa mga sementeryo kadungan sang ginmandu sang gobyerno nga closure halin Oktubre 30 tubtub Nobyembre 2.
Sirado naman ang Burgos Cemetery para sa bag-o nga inuglubong apang ginapahanugutan ang pagbisita diri halin alas-8:00 sa aga tubtub alas-5:00 sa hapon.
Ang lubong sa karon ang ginapatigayon lamang sa Handumanan kag Granada Cemetery.
