Naghingyo ang city government sang Bacolod sa Inter-Agency Task Force on Emerging Infectious Diseases nga pahanugutan ang ciudad nga palawigon ang enhanced community quarantine tubtub sa Mayo 15.
Nahibaluan nga antes makadesisyon ang local government unit kun ipabilin ang ECQ ukon idowngrade ini sa general community quarantine, kinahanglan pa nga aprubahan ini sang IATF.
Ang ciudad sang Bacolod ang nalakip sa moderate risk sa COVID 19 santo sa assessment sang IATF gani sarang na ini mapaidalom sa GCQ nagikan sa ECQ.
Ini man ang rason kun ngaa igadowngrade na sa GCQ ang Negros Occidental humalin sa Mayo 1.
Kaina sang aga, nagpatigayon sang special session ang Sangguniang Panlungsod sang Bacolod kag isa ka resolusyon ang ginpasar agud pormal nga hingyuon sa IATF nga pahanugutan ang ciudad nga padayunon ang ECQ tubtub sa Mayo 15.
Sa interview sang Bombo Radyo kay City Councilor Renecito Novero, chairman sang Quarantine Centers Action Team, nagdugang sang pito ang COVID positive sa Bacolod humalin sang ginpatuman ang ECQ kag subong nagadangat na sa siyam ang kaso.
Magluwas diri, madamo pa man ang pending nga laboratory test results nagikan sa swab sample nga ginkuha sa pamilya sang COVID parients.
Sa tion nga buksan ang Bacolod suno kay Novero, indi makontrol ang pagdagsa sang mga residente sa ciudad bangud ini ang sentro sang negosyo.
Ang pinakamaayo nga himuon sa karon sang city government suno sa konsehal amo ang prevention bangud limitado lamang ang mga hospital beds nga sarang maka-accommodate sang mga pasyente.
Nagalaom naman ang City Council nga aprubahan sang IATF ang hingyo sang city government bangud kabuhi sang tawo ang ginaamligan sa sini nga sitwasyon.
Ginhalimbawa naman sini ang ciudad sang Iloilo nga may pito ka mga kaso apang extended man tubtub sa Mayo 15 ang ECQ.
