Nagkomiter na ang ciudad sang Bacolod nga magabulig agud nga mapadasig ang pagproseso sang papelis para sa pagdugang sang source sang tubig nga masupply sa ciudad.
Sa interview sang Bombo Radyo Bacolod kay Councilor Claudio “Kalaw” Puentevella, chairman sa Committee on Energy sa Sangguniang Panlungsod, nag-ako na kahapon ang Bacolod City Water District (BACIWA) – Prime Water Inc. nga may-ara gid man sang kakulangan sa supply sang tubig sa Bacolod City.
Sa Water Summit, may-ara na sang mga nagkomiter nga water sources kag sa karun ginatinguhaan nga mapun-an ang kulang nga 20 million liters per day.
Kalakip sa mga nagkomiter amo sanday Murcia Municipal Mayor Gerry Rojas kag Talisay City Mayor Niel Lizares.
Suno diri, ginadihon nga makakuha sang 15 million liters per day gikan sa Bulk Water sa Murcia kag 5 million liters per day gikan sa Alangilan Spring Water sa ciudad sang Bacolod bangod ang BACIWA Prime Water may memorandum of agreement (MOA) na sa banwa sang Murcia.
Samtang ang Talisay City ang plano naman nga magpatigayon sang special project.
Ginpanugyanan na ang BACIWA Prime Water nga maghimo sang proposal agud madayun ang plano.
Suno kay Puentevella, sa dugang nga 20 million liters per day ini ang ginalantaw nga makasupply na sang tubig sa ciudad ang Bacolod sa sulod sang 20 oras sa bilog nga adlaw.
Indi kaangay sa karun nga nagakatabo kun sa diin may mga lugar nga duha tubtob tatlo ka oras lamang nagatubod ang tubig sa gripo kag kinahanglan pa nga magbugtaw sang mga konsumedor sa kaagahon agud makasalod.
Suno sa konsehal, sa report sang BACIWA Prime Water sila ang may nakaplastar nga plano agud mahatagan sang supisyente kag matinlo nga tubig ang ciudad sang Bacolod apang ini ang magalawig pa sang walo tubtob napulo ka tuig antes matuman.
Gin-athag ni Bacolod City Mayor Alfredo “Albee” Benitez, nga ang ginakinahanglan amo ang solusyon nga sarang mahimo sa sulod sang duha tubtob tatlo ka bulan.
Ginapakamaayo sang mga ini nga may-ara na sang mga nagcommit, kag tinguhaan na lamang sang Bacolod City Government nga maset-aside ang mga requirements kaangay sang mga papelis sa right of way kag approval sa Department of Public Works and Highways (DPWH) agud mapadasig ang pagsulod sang dugang nga supply sang tubig sa ciudad sang Bacolod.
