Ginpahanumdom sang Bacolod city government sa mga commercial establishment nga nagabaligya sang solvent nga indi magbaligya sa minors.
Ini kasunod sa nagtrending nga video kun sa diin may mga kabataan ang nagatililipon para magsinghot sang rugby nga nasulod sa plastic bottle.
Sang nakita sang mga kabataan nga may nagakuha sang video, amat-amat sila nga naglapta kag nagpalgyo samtang ang iban naman nagsenyales pa sang indi manami gamit ang ila tudlo.
Sa interview sang Bombo Radyo Bacolod kay Bacolod City Administrator Atty Mark Steven Mayo, dapat aware ang mga naganegosyo sang solvent sa city ordinance 328 series of 2003 nga nagapenalize sa paggamit, pagposses ukon indi otorisado nga pagbaligya sa minors sang volatile substance para gamiton sa indi insakto.
Suno diri, indi pwede baligyaan sang rugby ang mga menor de edad apang kun may upod nga adult wala sang problema ukon basta klaro kun diin gamiton ang rugby.
Suno kay Mayo, kun sin-o man madakpan nga nagabaligya sa mga minor ang mahimo dagdagan sang penalidad.
Pahayag sini, nagtap na siya sa Business Permits and Licensing Office (BPLO) para mapahanumdom ang ordinansa sa mga nagaprocess sang business permit.
