Nagapasalamat ang Bacolod City government sa national inter-agency task force (NIATF) sa pag-grant sang apelasyon sang ciudad nga idowngrade na ang quarantine status sini sa Modified General Community Quarantine (MGCQ).
Madumduman nga gilayon nga nagpagwa sang Executive Order No. 73 si Bacolod City Mayor Evelio Leonardia nga nagamando sang pagbalik sang ciudad sang Bacolod sa Modified General Community Quarantine (MGCQ) sumugod sa Disyembre 1 tubtob 31 gikan sa status nga General Community Quarantine (GCQ) kasunod sang pag-anunsyar ni Presidente Rodrigo Duterte nga igapaidalum ang National Capital Region (NCR), Batangas, Iloilo City, Tacloban City, Lanao Del Sur, Iligan kag Davao City kag Davao del Norte sa General Community Quantine (GCQ) samtang ang nabilin naman nga bahin sang pungsod kalakip ang Bacolod City ang ipaidalum na sa MGCQ.
Sa interview sang Bombo Radyo Bacolod kay City Administrator Em Legaspi-Ang, ginpahayag sini nga santo sa data nga ginpresentar sang ciudad kag sa data nagikan sa Department of Health (DOH) Region 6, nakit-an nga nagcomply kag nalab-ot sang Bacolod ang criteria para sa deescalation.
Suno kay Ang, ang PDITR ukonp prevent, detect, isolate, treat kag reintegrate gid ang ginasunod nga strategy sang Emergency Operation Center (EOC) agud nga macontain ang paglapta sang virus.
Dugang pa sini nga steady lang subong ang pagnubo sang mga kaso.
Nahibaluan nga sa data nga ginpagwa kahapon sang Department of Health (DOH) Region 6, may 12 ka mga kaso nga napagkit kahapon samtang sa data naman sa EOC, apat lang ang nagpositibo kahapon nga ginalakipan sang isa ka locally stranded individual (LSI) kag duha ka mga closed contact.
Suno kay Ang, amat-amat na nga nagaka-contain ang local transmission sa ciudad.
Nagpanugyan naman ini sa publiko nga magdoble halong sa kaugalingon ilabi na subong nga yara na sa idalom sang MGCQ ang status sang Bacolod bangud mas madamo na nga negosyo ang magabukas.
