Ginpasalig sang Bacolod City Government ang pagpadayun sa hugot nga monitoring sa mga gas station kun ginasunod ang natalana nga fuel price adjustments.
Madumduman nga luwas sa bigtime oil price rollback partikular na sa gasolina nakaligad nga semana, liwat nga magapanaog ang presyo bwas, Nobyembre 17.
Sa interview sang Bombo Radyo Bacolod kay Bacolod City Administrator Atty.Mark Steven Mayo, ang monitoring team ang ginapangunahan sang City Treasurer’s Office.
Una na sila nakapatigayon sang monitoring sang nakaligad nga rollback kun sa diin may apat ka branches sang dako nga fuel company ang natukiban nga wala nagpanaog sang nagakadapat nga presyo.
Sila ang nagpanubo lamang sang P12 sa staggered basis, imbes nga P16, kag panindugan sang opisyal nga nagsala lamang sila sa calculation.
Suno kay Mayo ang ciudad ang nagpadala na sang incident report sa Department of Energy angot sa ila assessment, kag ginahulat na lamang kun ano ang mangin tikang sang ahensya.
Pahayag sini nga mas pasanyugon pa ang monitoring bangod may mga reports nga may-ara sang nagapatuman sang rollback sa Martes, apang nagabalik lamang sa daan nga presyo kasunod nga adlaw.
Wala naman sang nakita nga problema sa supply kasubong man sa calibration.
Suno kay Mayo, kuliton nila ang DOE kun wala sang himuon nga tikang batok sa mga naglapas nga fuel company.












