Nagrasyon ang Bacolod City Government sang tubig sa duha ka barangay sa ciudad matapos nga madulaan sang supply sang tubig bangud sa nagluntad nga brownout.
Sa interview sang Bombo Radyo Bacolod kay Bacolod City Vice Mayor El Cid Familiaran, ang opisina ni Bacolod City Mayor Alfredo “Albee” Benitez ang nagpadala na sang rasyon nga tubig sa mga residente sang Barangay Handumanan kag Barangay Felisa.
Suno kay Familiaran, ang Bacolod City Fire Station ang nakarasyon naman sang tubig sa mga residente nga wala sang tubig.
Ginpahayag man sang bise alkalde nga ang mga Barangay Officials ang dapat magcoordinate sa ciudad kun kulang pa ang ginrasyon nga tubig agud nga makarequest sang dugang.
Suno sa bise alkalde, napaathag naman sang NEPC ang rason sang brownout kag ini ang bangud sa daan na nga transformer sang Alijis Feeder 3.
Suno diri apisar sang natabo nga brownout, ang power distributor ang nagahimo naman sang tikang agud nga maislan ang transformer kag mabalik na ang supply sang kuryente.
