Nagtukod na sang mga team ang Bacolod City government kasunod sang paglunsyar sang kampanya nga “Halong Ugyon Bacolod” ang Bacolod City Government sang Huwebes.
Suno kay Bacolod City Vice Mayor El Cid Familiaran, ang kampanya ang kabahin sang rekomendasyon sang Emergency Operation Center (EOC) kun sa diin nagatuyo sa pagpahibalo kag pag-edukar sa publiko angot sa importansya sang pagsunod sa mga health protocol karun nga may COVID-19 pandemic.
Sa karun, nag-organisar sang walo ka team ang ciudad nga amo ang magalibot kag magapahanumdom sa mga pumuluyo.
Ginakahangaw-an naman nga mangin kampante ang mga pumuluyo kag indi na magsuksok sang facemask nga magatuga sang liwat nga pagsaka sang impeksyon.
Suno kay Familiaran, tubtob nga wala pa sang vaccine, pagahugton sang ciudad ang mga preventive measures agud nga makabalik ang ciudad sa normal nga pagpangabuhi.
May-ara pa sang mga nagalapta sa social media nga nagapanginwala sa kabilidhun sang COVID-19 kag nagatuga man sang pagpati nga indi matuod ang virus.
Nagalaom naman ini nga magapati ang mga pumuluyo bangod matuod-tuod ang COVID-19.
Ginalantaw man ang posibilidad nga mapirmahan ni Bacolod City Mayor Evelio “Bing” Leonardia ang ordinansa nga ginduso ni Councilor Archie Baribar nga magamandu sang pagsuksok sang faceshield sa mga pampubliko nga lugar, may aircon kag madamo sang tawo.
