Nakahanda ang syudad sang Bacolod nga magpamati sa ginareklamo sang mga drivers kag operators sang mga traditional jeepney kag nakahanda naman sang augmentation sa tion nga kulangon ang salakyan sa Lunes, Mayo 8 kadungan sang natalana nga pag-untat biyahe sang pila ka transport group.
Suno kay Bacolod City Administrator Atty. Pacifico Maghari III, ginalantaw sini nga indi man maparalyze ang transportasyon apang nakahanda na ang syudad para sa augmentation sang masakyan sang mga pumuluyo.
Suno kay Maghari, may yara sa karun sang 500 ka units sang modernized jeepney nga nagabiyahe sa syudad.
Suno diri, nakahanda man ang syudad magpamati sa luyag ipadangat sang transport group sa patigayunon sang mga ini nga untat biyahe.
Ginpahayag man sini nga isa sa luyag nga ipalab-ot sang mga nagarally nga mga transport group ang pagkuha sang local publiv transport route planning kun sa diin isa man sa ginalantaw nga tun-an sang syudad.
Gin-athag naman sang pinuno sang Committee on Transportation sa Sangguniang Panlungsod nga ang local public transport route planning ang ginhatag sang Land Transportation Franchising and Regulatory Board LTFRB) kag indi sang syudad bangud ang syudad ang nagatuman lamang sang ginamando sang national agencies.
Suno kay Councilor Al Victor Espino, ginalantaw sang syudad ang welfare sang mga Bacolod kag mga bisita sang syudad nga mangin hilway ang pagbiyahe sang mga ini sa syudad.
Suno kay Espino, derecho sang kada isa ang pagpadangat sang ila nga mga reklamo apang ginapanindugan sini nga ang ginaproteksyunan sang syudad ang mayoriya sang Bacolodnon.
Gin-athag man sini nga ang modernization program ang ginapatuman sang national agencies ukon sang LTFRB kag ang syudad ang magasunod lamang diri.
Suno diri nagapasalamat man ini nga ang alkalde kag ang presidente close gani nahatagan sang special permits ang mga pila ka mga traditional jeepneys.
Ang LPTRP ang resulta sang joint resolution sang pagtuon sang mga government agencies nga ginalakipan sang DILG LTFRB kag LGU kun sa diin ginapatuman sang syudad sang Bacolod bilang kabahin sang jeepney modernization program.
