Nakahatag na sang kapin 40 mil ka mga food packs sa mga kabarangayan sa ciudad sang Bacolod.
Suno kay Pacita Tero, pinuno sang Department of Social Services and Development (DSSD), prayoridad sang programa ang mga yara sa transport sector nga nadulaan sang palangabuhian karun nga yara ang ciudad sa modified enhanced community quarantine (MECQ) sumugod sang Setyembre 8.
Una na nga ginhatagan ang mga numbered barangay samtang kasunod naman ang mga named barangay.
Nahibaluan nga may nabilin pa nga 38,000 tubtob 40,000 sa mga food packs nga dapat ipanagtag sang nagligad nga ginpreparar sang alkalde ingkaso magsaka ang kaso sang COVID-19.
Suno kay Tero, halos tanan ang nahatagan na sang bulig kag ang nabilin nalang amo ang Barangay Felisa kag Barangay 24.
Ang Barangay Felisa ang wala pa nakakuha sang food packs bangud wala pa ini sang magamit nga salakyan apang nagpahayag naman nga pagakuhaon gilayon.
Samtang gamay naman ang nabilin nga halatagan sa Barangay 24.
Ginpaathag ni Tero nga prayoridad ang mga jeepney, taxi, tricycle drivers nag mga remedio heneral nga indi na makagwa sa tagsa ka puluy-an.
Suno kay Tero, may mga naga-income sang manubo sa P10,000 nga nagasegi pa gihapon ang trabaho apisar nga MECQ kaangay sang Job Order employee kag mga labandera.
Nakaintindi naman ini nga bisan ano ang himuon, may yara gihapon sang magakomentar apang ginapanindugan nalang sang mga ini nga luyag nila nga magbulig.
