Ginalauman sang syudad sang Bacolod nga ikonsiderar ni Presidente Rodrigo Duterte ang ginpadala nga apelasyon nga indi pagpasakaon ang quarantine status sang syudad sa modified enhanced community quarantine (MECQ).
Madumduman nga kahapon ginrekomendar sang National Inter-Agency Task Force (NIATF) nga ipaidalum sa MECQ ang Bacolod City sa maabot nga Hulyo 16 tubtob 31, 2021.
Suno kay Bacolod City Administrator Em Ang, executive director sang Emergency Operation Center (EOC), nag-apelar ang mga ini bangod nakita man nila nga nagnubo na sini nga duha ka semana ang kaso sang COVID-19 kun ipaanggid sa nakaligad nga duha ka semana.
Paathag pa sini nga wala nila gingamit ang ila nga real-time data kundi nagbasi ang mga ini sa data sang Department of Health (DOH).
Ginpakigbahin pa sang City Administrator nga ang growth rate sang virus ang nagnubo sang 32 posyento samtang ang attack rate naman ang nagnubo sang 17 porsyento kun ipaanggid sa nauna nga duha ka semana.
Bangod sa pagnubo nga makita sa mga datos, indi naman makahangop sa Ang kun ngaa iga-escalate ang quarantine status sa MECQ, nga sa panulok sini mas nagakaangay pa nga panubuon sa modified general community quarantine (MGCQ).
Sa ginpasa nga apelasyon, ginlakip naman sang mga ini ang mga pamatuod kun ngaa indi nagakaigo ang pagpasaka sang quarantine status.
Paathag ni Ang, nga kun madayun ang MECQ status, madamo naman sang mga negosyo ang indi mapahanugutan sa pag-operar kag mangin mas manubo ang capacity limit sang sarang makagwa.
Suno pa sa City Administrator, bisan ang mga negosyo ang maga-ugyon nga indi na ang mga ini makasustinir kun panubuan pa sa 50 percent ang ila limit.
Paathag ni Ang nga haluson nalang makalampuwas ang mga negosyo kag ang 50 porsyento ang yara lang sa lebel nga mapatas lang sang mga ini ang ila nga capital investment.
Kun pagalimitahan pagid ang mga ini, mamierdihan na kag wala sang kita ang mga negosyo.
Paathag ni Ang nga madamo sang mga negosyo ang maga-antos gikan sa medium, small ilabi na ang mga micro enterprises.
Suno sa City Administrator, ginahatagan lang sila sang tubtob alas-5:00 subong nga hapon sa pagpasa sang apelasyon.
