Ginkumpirmar sang pinuno sang Negros Occidental Provincial Veterinary Office (PVO) nga nagtawag man ang opisina ni Bacolod City Councilor Carl Lopez sa iya agud nga mabuligan man sang probinsiya ang syudad agud nga mapasaka ang ila nga production area bangud ang presyo sang baboy sa syudad ang nagadangat sa P255 kada kilo komparar sa Hinobaan kag Kabankalan nga nagadangat lang sa P210 kada kilo.
Sa interview sang Bombo Radyo Bacolod kay Dr. Renante Decena, ginpahayag sini nga 25 porsyento lang ang maproduce nga baboy sang syudad gani mahal ang presyo.
Pahayag naman sini nga maydako nga potensyal ang syudad sa pagproduce sang baboy.
Dugang pa sini nga madamo ang lugar sa syudad nga sarang mabutangan sang mga babuyan.
Suno kay Decena ang mga backyard hog raisers sa Barangay Banago ang nagapakonsulta man sa veterinary clinic sang probinsiya.
Suno pa diri, dapat buligan sang probinsya ang syudad kag tinutuyo nila nga ang food security ang maagum sang tagsa ka barangay ukon LGU agud indi na makapasulod sang imported nga baboy sa probinsiya kag maga export nalang sang baboy ang mga hog racers.
