Ginahulat-hulat na lamang sang Bacolod Traffic Authority Office (BTAO) ang mangin epekto sa dalan sang trapiko sang ginaplano nga pagpahanugot sa isa ka third party company nga magpatigayon sang parking services.
Sa interview sang Bombo Radyo Bacolod kay BTAO Head Patrick Leonard Lacson, nakita sa survey nga 110,000 ang average nga numero sang salakyan nga nagasulod sa Bacolod City, apang yara lamang sa 7,000 ang capacity sang parking spaces.
Paathag sini nga isa sa nagapanguna nga rasun sa paggutok sang trapiko amo ang mga salakyan nga nagapark sa higad sang mga dalanon bangod wala sang kaugalingon nga parking space.
Bangod sini naghatag na sang go signal si Bacolod City Mayor Alfredo “Albee” Benitez para sa pagpatigayon sang Memorandum of Agreement (MOA) sa negosyante nga si Charles Dumancas para sa parking services, apang sa karun ini ang ginatun-an pa sang Sangguniang Panlungsod.
Paathag ni Lacson nga apisar nga isa lamang ka kompanya ang ma-awardan sang MOA, ini ang mangin coalition bangod ang iban nga may mga properties kag luyag magsulod sa parking services, ang mahimo man nga makig-angot sa third party.
Suno diri, nakita na sang mga investors nga dako ang kwarta sa parking services sa Bacolod City kag bisan pa nga magamay lamang ang land area sang isa ka persona, ini ang ma-expand pa kun himuon nga masobra sa isa ka panalgan ang parking area.
Samtang magluwas diri, suhestyon man ni Lacson kun mahimo nga maghuman sang ordinansa ang Sangguniang Panlungsod nga magarequire sa mga tag-iya sang idle land, ukon ginpabay-an na lamang nga duta nga doblehon ukon triplehon ang ila nga bayaran nga taxes kun indi sang mga ini pag ipahulam sa gobyerno agud mangin parking spaces ang ila wala man ginagamit kag ginapabay-an na nga propedad.
Panawagan man sang BTAO Head sa mga business owners nga sa pagtukod sang negosyo, kalakip dapat sa ginakonsiderar ang parking spaces agud nga may maplastaran ang mga customers.
