Nagpanugyan ang Bacolod City Health Office sa mga maka-angkon sang rashes nga magpacheck up sa doktor agud mahatagan sang bulong ukon advice sa dapat himuon.
Ini kasunod sang pagduging sang viral exanthem nga naglatun sa 32 ka mga estudyante sang Negros Occidental High School.
Sa interview sang Bombo Radyo Bacolod kay Dr. Grace Tan, head sa environmental sanitary division sang Bacolod City Health Office, indi pa makabig nga outbreak ang natabo sa NOHS bangod 32 lamang ang nalatnan gikan sa 9,000 nga mga estudyante.
Suno diri, ang viral exanthem ang generic name lamang para sa rashes nga natuga sang organism nga makatuga sang infection kaangay sang bacteria, fungi kag ang pinakacommon amo ang virus.
Kalakip sa makabig viral exanthem ang sulalob.
Paathag ni Tan nga lain naman ang rashes nga tuga sang allergy nga wala sang risgo nga makalaton.
Ang viral exanthem ang sarang makalaton pinaagi sa droplets, pagpangatsi ukon pag-ubo kasubong man sa pagtandog sang mga butang nga natup-an sang droplets kaangay sang doorknob.
Kalakip sa sintomas sang viral exanthem ang paghilanat.
Ang rashes ang sarang magdugay sang isa tubtob pito ka adlaw, depende sa immune system sang matapikan.
Panawagan ni Tan nga kun may rashes magpakonsulta gilayon sa doktor agud matumod kun ano ang rasun kag mahatagan sang bulong kag abiso.
Samtang panugyan man sini sa mga nagahana nga maglain ang pamatyag nga mas maayo kun magsuksok sang facemask.
