Nagapanawagan ang Bacolod City Health Office sa tanan nga barangay nga magpatigayon sang cleanup drive matapos makarekord ang ciudad sang dugang nga duha ka dengue casualties.
Lakip sa napatay ang lima ka tuig nga bata nga babayi sa Barangay Granada kag apat ka tuig nga bata nga babayi sa Barangay Mansilingan.
Nahibaluan nga ang una nga napatay bangod sa dengue subong nga 2026 ang naggikan sa Brgy Villamonte.
Sa karon, nagdangat na sa 448 ang nareport nga dengue cases sa ciudad subong nga tuig.
Sa interview sang Bombo Radyo, ginpahayag ni Dr. Grace Tan, head sang CHO Environment and Sanitation Division, ginpahayag sini nga gina-engganyo nila ang tanan nga brgy kag mga pumuluyo nga magpartisipar sa clean up drive.
Suno diri, kinahanglan pangitaon gid ang breeding site sang lamok, lakip ang mga lugar nga may naga-pondo nga tubig, sa sulod kag gwa sang ila mga panimalay.
Suno kay Tan, indi dapat magsalig lamang sa health workers bangud dapat yara sa household level ang pagpanglimpyo sa ila tagsa ka balay bangud indi na ini makita ukon malab-otan pa sang mga health workers.
Paathag man sini nga ang fogging kag spraying intervention ang ginapatigayon lamang sa may madamo nga kaso sang dengue bangud mahimo nga ini ang makaapekto sa air quality.
Mensahe sini sa mga pumuluyo nga magbinuligay ang tanan sa pagtapna sang dengue agud indi na madugangan pa ang kaso.
