Nagpaandam ang Bacolod City Health Office sa mga pumuluyo sa mangin epekto sang paglapta sang ashfall kag baho sang asupre.
Sa interview sang Bombo Radyo Bacolod kay Dr. Grace Tan, head sa Environmental Sanitation Division, sa paglupok sang bulkan ini may ginabuga nga gas kag solid particles nga makaapekto sa ikaayong lawas sang tawo.
Suno diri, sa mga lugar nga malapit sa area sang Mt Kanlaon, dapat nga magsuksok sang facemask kag likawan ang pagtinir sa gwa para mahilway sa mga sakit kaangay sang eye irritation, sore throat, physical injury kag iban pa.
Bangod man nga naga-upod sa hangin ang mga gas kag particle gikan sa bulkan, ini nagalapta sa iban nga mga banwa kag ciudad.
Panugyan ni Tan sa mga area nga malayo sa Mt Kanlaon, bangod nga nagalapta ang baho sang asupre mas maayo nga maggamit sang facemask ilabi na sa may mga hapo kag kun indi na masarangan ang tuman nga baho.
