Nagpaandam ang Bacolod City Health Office batok sa mga masakit nga posible makuha subong nga maulanon ang panahon.
Suno kay Dr, Grace Tan, Head sang Environment and Sanitation Division sang Bacolod City Health Office, antes mag-ubog sa tubig baha magsuksok sang Personal Protective Equipment (PPE) apang kun indi gid malikawan magpanghugas gilayon sang tubig kag habon kag gilayon nga magkadto sa City Health para sa prophylaxis.
Suno kay Tan, likawan man nga padamuon ang basura ilabi na ang mga madunot kag water waste bangud ini ang posible balayan sang mga ilaga nga tunaan sang leptospirosis.
Dugang pa sini nga ireport gilayon ang mga leakage sa water pipes agud makay-o agud indi ma-contaminate ang tubig nga ginagamit panghugas sa mga utensils kag ginagamit sa pang adlaw-adlaw.
Siguruhon man nga ang ginainum nga tubig ang naghalin sa water source nga may license agud may monitoring kag nakapasar na sa requirement sang LGU para sa permit.
Subong nga tag-ululan na dapat siguruhon nga napakulob ang mga posible tiniran sang tubig kag balayan sang lamok nga nagadala sang dengue.
Panugyan sini nga dapat tinluan ang palibot kag siguruhon nga ang basura ang nahaboy sang insakto agud nga wala sang tiniran ang ilaga kag lamok.
Sa pihak nga bahin, gin-athag ni Dr, Grace Tan, wala sang oil spill sa Barangay Banago, Bacolod City.
Suno kay Tan sa ila nga pag-inspection wala sang indikasyon nga may oil spill.
Suno diri ang nakita didto madamo sang basura nga nagasupon sa creek kag maitum ang tubig bangud posible indi makailig ang tubig.
Dugang pa sini nga nagalatab sa tubig gani wala sang oil spill bangud basura nga nagatambak ang nakita sang mga ini.
