Ginkumpirmar sang Bacolod City Health Office nga isa ka 52 anyos ang nagtaliwan bangud sang suspected leptospirosis.
Sa interview sang Bombo Radyo Bacolod kay Dr. Grace Tan, pinuno sang Environment Sanitation Division, ang napatay ang isa ka lalaki nga residente sang Brgy Villamonte, Bacolod City ang nagatrabaho sa general services kag isa trabaho sini kaangay sang construction.
Suno kay Tan, may history ang nasambit nga persona nga nagpanglimpyo sang drainage kag nangin unremarkable na ang paghilanat sini gani nagpakonsulta ini.
Nakita sang attending physician nga nabudlayan na ini nga magginhawa tubtob nga gin-admit sa ospital kag ginbawian sang kabuhi.
Suno diri, ang kaso sang biktima ang yara na sa second stage sang leptospirosis kun sa diin may yara na sang komplikasyon kun sa diin may pulmonary hemorrhage na kag nagayellow na ang mata sini.
Sa record sang CHO may apat ka leptospirosis cases kag isa ang napatay.
Nagpahanumdom man ini sa tanan nga kun may nabatyagan na indi pagdala-dalahon kag ugalion nga mangin malimpyo sa palibot agud nga makalikaw sa balatian kaangay sang leptospirosis.
