Nakarecord ang Bacolod City Health Office (CHO) sang pinaka-una nga napatay sa leptospirosis sa ciudad sang Bacolod sa sini nga tuig 2026.
Ginkumpirmar ni Assistant City Health Officer Dr. Grace Tan nga ang lalaki ginbawian sang kabuhi sa ospital sang nakaligad nga bulan sang Enero.
Suno kay Tan, nakabatyag sang sintomas ang biktima kag gilayon nga gindala sa ospital kag didto nadiskubrehan nga naglala na ang iya nga sakit.
Suno diri, posible nga sang Disyembre nag-ubog ini sa baha kag didto nakuha ang amo nga sakit.
Ginpahayag sini nga ginahulat nila ang duha ka semana nga incubation period kasunod sang pagbaha nga naeksperyensyahan sa ciudad agud mahibaluan kun nagsaka ba ang kaso sang leptospirosis.
Panugyan ni Tan sa publiko nga magpadulong sa health center kun posible nga may ara sang exposure sa kontaminado nga tubig baha agud mahatagan gilayon sang nagakaigo nga bulong kaangay sang prophylaxis.
Ginklaro sini nga ang mga bulong ang wala sang bayad kag may ara sang nagakaigo nga supply para sa kada barangay.
Samtang, natalana naman nga magpagwa ang CHO sang consolidated report angot sa mga kaso sang leptospirosis sa ciudad.
