Nagpanawagan ang Bacolod City Health Office nga ire-activate sang tagsa ka Barangay ang ”4 o’clock habit” batok sa dengue.
Sa interview sang Bombo Radyo Bacolod kay Bacolod City Health Office Head Dra. Carmela Gensoli, makaalarma ang pagsaka sang kaso sang nasambit nga balatian nga nagdangat na ang kaso sa 794.
192 naman ang bag-o nga dengue cases kag ang Barangay nga may pinakamataas nga kaso amo ang Barangay Taculing, nga ginsundan sang Barangay Bata, Bacolod City.
Karun nga nagsugod na ang klase, mga kabataan man ang kalabanan nga biktima sang dengue.
Apang paathag ni Gensoli nga indi pa makadeklarar sang dengue outbreak, kag ang Department of Health (DOH) ang may ginpadala man nga monitoring team sa mga lugar nga may clustered cases.
Magluwas sa pagpatigayon sang fogging sa mga eskwelahan kag mga establishments nga magarequest, ang City Health Office ang nagapanagtag man sang larvicide kag adulticide nga mabubo sa mga stagnant waters agud indi mapangitlogan sang lamok.
Suno kay Gensoli, sadto may ginapatuman nga ”4 o’clock habit” ang tagsa ka Barangay apang ini ang na-untat sang magluntad ang COVID-19 pandemic.
Gani panawagan sini nga ireactivate ang programa kun sa diin may magaserbe nga alarma sa publiko pagpatak sang alas-4:00 sang hapon, para sa pagpaninlo sang palibot kalakip na ang pagpangita sang mga sarang mapangitlogan sang lamok.
Paathag sini nga indi masarangan sang City Health Office ang tanan nga tikang, kag kinahanglan nila sang kooperasyon sang tanan nga pumuluyo.
