Hulaton na lamang sang chairman sang Inter-Agency Task Force sa ciudad sang Bacolod ang guidelines nga ipagwa sang National Inter-Agency Task Force angot sa pagbalik sa ciudad sa modified General Community Quarantine.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga sundon sang IATF Bacolod ang guidelines sang National IATF bangud indi ang mga ini ka pagusto himo sang ila mga guidelines.
Ginpahayag man sini nga sa modified GCQ, may biyahe na ang public transportation apang regulated ang mga pasahero sini.
Nagpanugyan man ini sa mga pumuluyo nga magpabilin sa pag-observe sang social distancing, magsuksok sang facemask kag hand hygiene.
Ginalantaw naman sang gobernador sang probinsya nga sabat sa pangamuyo sang kadam-an ang desisyon sang national government nga modified general community quarantine ang tanan nga mga lugar nga gintumod sang IATF nga low risk areas santo sa gin-isyu sang mga ini nga resolusyon no. 35.
Suno kay Governor Eugenio Jose “Bong” Lacson, gusto lamang sini nga mahibaluan ang guidelines sa modified GCQ kag importante lamang suno diri nga padayon nga sirado ang seaports kag airports agud macontrol ang mga tawo nga nagabalik sa Negros Occidental.
Samtang, lantawon man ni Bacolod City Lone District Congressman Greg Gasataya ang kaundan sang guidelines sang modified General Community Quarantine agud mahibaluan kun gin-islan lamang ang terms sini kaangay lang sang ginhimo sang Department of Health sa terms sini sa mga infected sang coronavirus disease.
Suno kay Gasataya, mahimo nga gin-islan lamang ang terms apang pareho lamang ang buot silingon.
Nagpanugyan man ini nga ipadayon lamang ang implementasyon sang social distancing kag pagsuksok sang facemasks sa publiko kaangay sang public markets.
