Ginpalawig sang Bacolod, Victorias City kag Silay City ang pagpatuman sang suspensyon sang face-to-face classes tubtob bwas, Setyembre 18.
Gin-anunsyar ni Bacolod City Mayor Alfredo ‘Albee’ Benitez ang suspensyon sang klase tubtob bwas para sa preschool tubtob high school, pampubliko man ukon pribado nga eskwelahan.
Nakadepende naman sa college ukon universities kun sila ang magasuspinder man sang face-to-face classes.
Paathag sini nga siya ang nagasalig sa rekomendasyon sang Bacolod City Disaster Risk Reduction and Management Office, nga may nagakaigo nga tools sa pagtumod sang panahon.
Nahibaluan nga may mga eskwelahan man nga nagapatigayon sang asyncronous classes ukon online kag modular classes.
Panawagan na lamang ni Benitez sa mga ginikanan nga bisan ara lamang sa balay, giyahan ang mga kabataan sa pagtuon.
Sa pihak nga bahin, una naman nga nag-anunsyar sang suspension sang face-to-face classes si Victorias City Mayor Javi Benitez.
Paathag sang alkalde nga sila ang wala nagapalumba-anay sa pag-anunsyo bangod aminado ini nga importante ang pagtuon.
Apang kabaylo sang malain nga tiyempo ang risgo sa mga kabataan, nga indi naman sini mahimo nga mabaylo.
Samtang nag-anunsyar man sang suspension sang face-to-face classes si Silay City Mayor Joedith Gallego.
