Ginklaro sang tagpamaba ni Bacolod City Mayor Alfredo “Albee” Benitez nga misleading ang nagalapta nga video nga ginaluto kag ginasud-an ang isda nga nakumpiskar sang Bacolod City Legal Enforcement Unit gikan sa isa ka vendor nga ila nga nadakpan nga nagabaligya side walk.
Sa interview sang Bombo Radyo kay Atty Caesar Distrito, wala sang may nagpadangat sang reklamo sa Bacolod City Legal Office angot sa gina-alegar nga ginahimo sang personnel.
Suno diri, nagpahayag ang personnel nga basta may yara sila sang makumpiskar nga perishable goods, ila ginasunod ang protocol sang ciudad nga ihatag ini sa mga institution kag foundations nga makapulos sini.
Dugang pa sang personnel nga magagmay ang isda nga ila nakuha kag ang ila nga ginluto amo ang isda nila nga ginbakal mismo sa merkado.
Nagpasalig naman si Distrito, kasunod sa pahayag man sang alkalde nga basta may yara sang reklamo sa City Legal Office, ini ang hatagan sang nagaka-igo nga tikang.
Samtang, mesahe naman sini nga posible nga madulaan sang trabaho kag maguba ang pangalan sang isa ka tawo nga wala nagatrabaho sang insakto, kag mensahe man sini sa mga naga-video, naga-picture kag naga-post nga mangin responsable bangod nga sila ang makaguba sa ila isigkatawo.
