Ginatun-an kag gina-usisa na sang Bacolod City Legal Office kun sin-o man ang nag-umpisa sa pagpalapta sang mga fake news sa social media.
Sa interview sang Bombo Radyo Bacolod kay City Legal Officer Atty Romeo Carlos Ting Jr., sang Huwebes ang van sang ciudad ang gindeploy para mag-assist sa mga nastranded nga pasahero sang transport strike.
May yara sang nakabutang nga signage sa van nga ‘Libre Sakay’ kag may staff sang ciudad ang nagarekord kun pila ang pasahero nga na-cater.
Apang, may yara sang nagkuha sang picture sang van kag nagpost sa social media nga may nagalibot nga van nga nagapang-ingganyo sa mga tawo nga magsakay samtang may yara man sang alegasyon nga may isa nga ginbutong kag gintutokan sang patalom.
Suno kay Ting, ang maayo nga tuyo sang ciudad ang ginbutangan pa sang katuntohan kag ini ang nagtuga sang panic sa publiko.
Pahayag ni Ting, gina-usisa na sa karun kun sin-o ang mga nagapalapta sang fake news samtang kalabanan diri ang nag-delete na sang ila nga social media account kag indi na macontact sa karun.
Ginatun-an naman kun ano ang madagdag nga kaso sa mga nagapalapta sang indi matuod nga impormasyon nga nagadisturbo sa public order.
Samtang, wala pa sang may nagpablotter sa Bacolod City Police Office natuhoy sa mga insidente sang pagpang-abduct sang mga nagalibot nga mga van sa ciudad.
