Gindemolish sang Bacolod City Legal Enforcement Unit ang mga tyangge nga nahamtang sa sidewalk sa Purok Kasanag, Lacson St., Brgy. Mandalagan.
Suno kay Levy Pangue, focal person sang City Legal Enforcement Unit, may isa ka residente sang O residence ang nagreklamo nga illegal structure ang kalan-an kag tyangge nga nahamtang sa side walk.
Suno diri, ginserbehan nila sang notice to vacate ang nagapanag-iya sang tyangge kag ginhatagan sang 15 ka adlaw para boluntaryo nga maghalin.
Suno kay Pangue, madugay na nga nakatukod ang tyangge sa sidewalk humalin pa sang ginatukod ang residential building.
Naga- apelar ini sa mga pumuluyo nga ang sidewalk para sa tanan kag indi para sa indibidwal lamang.
Nagapanawagan man ini sa mga Barangay sa ciudad nga magkooperar sa ila bangod kun kaisa may yara sila sang ginapahalin sa area apang ginabuslan lamang sa gihapon.
Samtang, nangin emosyonal naman ang nagapanag-iya sang kalan-an matapos nga gindemolish ang iya balaligyaan.
Sa interview sang Bombo Radyo kay Maria Ruby Laguyo Roquero, wala sang trabaho ang iya bana kag indi naman siya makapangita pa sang obra bangod sa iya edad amo nga nagasalig na lamang siya sa ma-income sa iya kalan-an kag tyangge.
Suno diri, bisan nga may mga trabaho na ang iya mga kabataan, ginatinguhaan sini nga indi na mangayo sang sa iya mga bata kag nagbulig pa siya sa gasto sa iya apo nga may sakit sa tagipusoon.
Suno kay Roquero, ang nabaton sini nga ayuda bilang isa sa mga biktima sa paglaslas sang bagyo TINO, gingamit niya para ipakay-o sang ila stall agud may kuhaan ini sang magasto sang pang-adlaw adlaw kag ginpa-iway anay sini ang pagpakay-o sang ila balay.
Nagapangabay ini sa karun nga maintindihan man sila nga pigado nga nagapangabuhi kag kun tani patas man ang pagtrato sa ila.
Samtang, ginkalipay naman sini nga ginturn-over sa iya ang mga materyales matapos gindemolish ang iya stall.
