Lantawon pa sang Bacolod City Legal Office kun kay sin-o nga tawhanon nga kinamatarong ang nalapas sa nagluntad nga tensyon sa ginpatigayon nga rally-protests sang transport group sa atubang sang EL Fisher sang Miyerkules.
Madumduman nga gin-aresto ang apat ka mga transport leaders nga wala nagsunod sa dispersal order sang Bacolod City Police Office.
Napilitan ang kapulisan nga bombahan sang tubig ang mga nagarally kag ini man ang ila ginbalusan sa pagpamungkoy sang bato kun sa diin isa ka pulis ang napilasan.
Sa interview sang Bombo Radyo Bacolod kay Bacolod City Legal Officer Atty. Romeo Carlos Ting Jr., ang rally-protests nga ginpatigayon sang transport group ang wala sang permit.
Suno kay Ting Jr., sang nagrally ang mga ini sa Bacolod Government Center sadto wala man sang permit, ginpabay-an lang sang ciudad apang ginliwat pa nila sang Miyerkules.
Suno diri, ginahulat nalang ang approval sa hugot nga pagpatuman sang “no permit, no rally” sa ciudad sang bangud nagaamat-amat na ang mga nga nagabayolente.
Dugang pa sini, kun sa ginlapas naman nga tawhanon nga kinamatarong tun-an pa sang ciudad kaangay lamang sang human rights sang street vendors nga indi na makabaligya bangud sa rally.
Kinamatarong sang mga drivers nga ginpilit mag-upod sa rally sa baylo magbiyahe ukon sa management sang hotel bangud naigo ang crystal kasunod sang pagmato.
