Ginpadala na sang Bacolod City Legal Office ang show cause order sa opisina ni Bacolod City Mayor Greg Gasataya batok sa isa ka regular employee sang ciudad nga gin-alegar nag-inum sa isa ka bar kag nagapakilala nga empleyado sang ciudad agud nga indi magbayad.
Una na nga nagpaandam si Bacolod City Mayor Greg Gasataya batok sa mga empleyado sang ciudad nga ginapatihan nagagamit sang ila posisyon ukon estado agud makalikaw sa pagbayad sa mga food kag beverage establishments sa Bacolod.
Suno kay Gasataya, nakabaton siya sang mga impormasyon angot sa amo nga alegasyon kag gilayon nga nagmando sang imbestigasyon agud mahibaluan ang matuod nga natabo.
Ginpabutyag man sang alkalde nga indi dapat pag-abusuhon ang mga lokal nga negosyante bangud sila ang mga taxpayers nga nagapangabudlay para sa ila matarong nga pangabuhi kag kinahanglan nga protektahan, indi pagpiguson.
Sa interview kay Bacolod City Legal Officer Atty. Karol Joseph Chiu, natumod na ang empleyado kag nadihon na ang show cause order nga sa karun ginahulat nalang ang desisyon sang alkalde.
Suno kay Chiu, ang nasambit nga empleyado ang yara sa supervision sini apang ginpahayag sini nga wala niya ginatolerar ang kaangay nga indi maayo nga buluhaton sang isa ka empleyado.
Suno diri, ang empleyado ang wala na ginapaupod sa ginapatigayon nga inspection sa mga establishmento.
Nagpanugyan ini sa mga empleyado nga indi pag-abusaran ang posisyon ang ginhatag sa ila agud nga makaserbisyo sa mga pumuluyo.
