Gin-athag sang Bacolod City Legal Office nga public safety ang nagapanguna nga rasun sa pagpangkakas sang tarpaulin sang mga nagakandidato sa City Heights Subdivision sa Barangay Taculing.
Madumduman nga gina-alegar sang kontra partido sang administrasyon nga pamulitika ang pagpamalos sang tarpaulin sang mga kandidato sa Grupo Asenso.
Suno kay City Legal Officer Atty Joselito Bayatan, ginakonsiderar na nila bilang billboards ang natakod nga tuman ka dako nga tarpaulin sa gate sang subdivision.
Paathag ni Bayatan nga sa lateral postering, agud maangot sang mga ini ang tarpaulin sa duha ka mga poste, ginbanting nila ini sa mga kuryente nga naangot sa mga poste.
Ginabanta anom tubtob walo ka mga banting ang nakita sang City Legal Office, nga ginakahangawa sang mga ini nga mahimo maka-utod sa mga kuryente inkaso nga maghangin.
Dugang pa sini nga bangod sa tuman ka dako nga tarpaulin nga ginbutang sa dalan, indi naman malikuan sang mga salakyan ang lugar kag makahatag sang huol sa mga nagasulod kag gwa nga salakyan sa subdivision.
Paathag ni Bayatan nga disturbo kag delikado ang nasambit nga mga tarpaulin gani ila ginpangpalos.
Pahanumdom sini nga nagpagwa ang Office of the President sang Presidential Directive No. 60 sadtong 2006 nga nagapahayag nga mahimo kakson ang mga illegal billboards.
Dugang pa sini nga sang 2007, ang Department of Public Works and Highways (DPWH) ang nagpagwa man sang Memorandum Circular No 7 nga nagapahayag nga mahimo makakas ang mga campaign materials kun ang mga ini ang nabutang sa mga public places.
Panugyan ni Bayatan nga sundon nalang ang layi.
Dugang pa sang City Legal Officer nga bisan wala sang layi, common sense na kag kun may concern sa isig-kapareho indi dapat magbutang tarpaulin sa poste.
Ini bangod sa tion sang emerhensya, mabudlayan sa pagtaklas sa poste kun ini ang may nakatakod nga mga campaign materials.
Paathag ni Bayatan nga ang Commission on Election (COMELEC), Bacolod City Police Office (BCPO) kag City Legal Office ang may tripartite memorandum sang Desyembre 17, 2021 nga magahugpong sa pagpamalos sang kaangay nga mga iligal nga posters.
