Nagakoordinar ang Bacolod City Legal Office sa mga opisyal sang Barangay Cabug kasubong man sa Barangay Felisa angot sa pagregulate sa mga ambulant vendors nga nagabaligya sa Bacolod Economic Highways.
Sa interview sang Bombo Radyo Bacolod kay Bacolod City Legal Officer Atty. Romeo Carlos Ting Jr., sang una sila nga nagtsekyar kapin 30 ang mga nagabaligya sa dalan kun sa diin ila nga ginlantaw kun may health card ang mga vendors nga nagakahulugan nga nakakuha na sang sanitary permit gikan sa Bacolod City Health Office.
Ini bangod luyag nila nga maseguro nga safe ang mga pumuluyo sa mga ginabaligya nga pagkaon.
Apang sa karun, nagdangat na sa 60 ang mga stalls sa lugar.
Suno kay Ting, nagkoordinar na sila sa duha ka Barangay agud maregulate ang pagbaligya sa area kag lantawon kun ang mga ini nagbaligya sa pahanugot sang mga Barangay.
Dugang pa sini nga ang mga salakyan ang nagalaksam sang space sa dalanon.
Ginalantaw man sini kun may posibilidad nga may nagapaarkila sa mga pwesto.
Sa ulihi nga pagtsekyar sang Bombo News Team, may-ara naman sang nagpwesto nga ukay-ukay sa area.
