Ginapahanumdom sang Bacolod City Legal Office sa tagsa ka Barangay nga estrikto nga ipatuman ang curfew for minors.
Sa interview sang Bombo Radyo Bacolod kay Bacolod City Legal Officer Atty. Romeo Carlos Ting Jr. ang City Ordinance angot sa curfew for minors ang gin-umpisahan sang 2003 pa, apang wala lamang gina-implementar sang maayo.
Ang curfew ang naga-umpisa alas-10:00 sang gab-i tubtob alas-4:00 sang kaagahon.
Pahanumdom ni Ting nga ini ang dapat ma-implementar sang tagsa ka Barangay sa Bacolod City ilabi na nga nag-umpisa na ang klase.
Kalakip na diri ang pagtsekyar sang mga Barangay Tanod sa mga establishimento kaangay sang mga computer shop, bar kag mga kalan-an sa nasambitan nga oras, kun may-ara pa sang nakatambay nga mga menor de edad.
Panugyan pa sini nga dapat magbutang sang siren ang tagsa ka Barangay kaangay sa ginahimo sang Barangay Handumanan nga magaserbe nga pahanumdom sa mga kabataan nga alas-10:00 na sang gab-i kag dapat sila ang yara na sa panimalay.
Ini ang intervention man sang ciudad ilabi na sa karun nga may mga nagagwa nga issue tuhoy sa abduction.
Ang mga minors nga madakpan sa paglapas sang curfew ang mangatubang sang penalidad.
Suno kay Ting sa first offense, ang mga ini ang hatagan lamang sang warning; sa second offense, walo ka oras nga community service; kag sa third offense, 16 oras nga community service.
Ang penalidad ang magasaka pa kun padayun nga magasulit-sulit sa bayolasyon.
