Natalana nga magpatigayon sang pag-review ang Bacolod City Legal Office sa mga ordinansa sang ciudad ilabi na sa mga penalidad.
Madumduman nga liwat na nga naga-operate ang Akasya grill sa 7th St. Capitol Subd., Barangay 7, sang ini nakabayad sang penalidad nga P1,500.
Ini ang ginsarid-an bangod sa natabo nga pagpang-molestya sa 17 anyos nga bata nga babayi kag natukiban nga wala sang business permit ang establishimento.
Suno kay Bacolod City Legal Office Head Atty Romeo Carlos Ting Jr, nagkuha sang business permit ang establishimento sang tinalikdan nga tuig kag ini nakabayad sang penalidad.
Suno diri, subong nga tuig dapat ini liwat nga magkuha sang business permit kag isa sa mga requirements amo ang barangay clearance, apang kun indi mahatagan sang brgy clearance ang establishimento, suno kay Ting, indi ini maka-operate.
Samtang, luyag man sang alkalde sang ciudad sang Bacolod nga matutukan ang mga ordinansa sang ciudad.
Suno kay Bacolod City Mayor Alfredo Benitez, may yara sang mga tuman na gid ka daan nga mga ordinansa nga nahuman pa sadtong 1970’s nga may mga penalidad nga tagP200 ukon P100.
Suno diri, ila pagadiskusyunan ang pagreview kag pagupdate sa mga city ordinance, ilabi na ang mga dumaan na kasubong man sa mga penalidad sini.
