Gin-athag sang City Legal Officer sang Bacolod nga indi overpriced kag proposal pa lang ang P2,500 nga budget para sa isa ka botelya sang Vitamin C with Zinc agud makabulig sa paghatag sang ikaayong lawas batok sa paglaton sang COVID-19 sa ciudad.
Madumduman nga ginkwestiyon ni Councilor Wilson Gamboa Jr. ang presyo bangod nagbakal man ini kag balor P349 lang kun sa diin ginpakita pa sini ang sample sa special session nga ginpatigayon sang Agosto 29.
Sa statement nga ginpagwa ni Atty. Joselito Bayatan, ginpahayag sini nga ang nasambit nga balor ang estimated maximum price pa lang nga ginbutang sa proposal bangud tinutuyo sang SP nga makabakal sang bitamina nga may mataas nga kalidad kag maagi pa ini sa bidding.
Suno kay Bayatan, maagi man ini sa City Health Office kag kun makit-an nga overpriced kag indi maayo ang kalidad sang vitamins, sarang nga marefuse ukon madeny ang pagbakal.
Suno sa iya, wala pa nakalab-ot ang SP sa baklanay sang vitamins bangud proposal pa lang ang budget gani indi dapat maghambal si Gamboa nga overpriced ini.
Suno diri, kuntani ginverify anay ni Gamboa ang impormasyon bangud daw kaangay lang nga ginpakahuy-an niya ang ciudad kag kasubong nga mga SP members bangud yara man siya padeliberate sang budget.
Suno sa city legal officer, ginpakita lang sang konsehal ang iya pagka-ignorante sa layi apisar nga opisyales ini sang ciudad.
Kuntani, suno kay Bayatan, mahuya si Gamboa sa iya mga kaupdanan sa konseho indi kay siya pa ang malabugay sa mga pumuluyo.
Gindugang man sini nga halos tanan nga miyembro sang SP ang nagboluntaryo nga magpakigbahin sa mga komitiba sa ciudad batok sa COVID-19 apang wala gid ini sang may gin-intrahan.
Gintawag man sini nga “dirty politics” ang ginahimo ni Gamboa.
