Ginpahayag naman sang kongresista sang ciudad sang Bacolod nga isa ka kasaysayan ang natabo nga pagpirma ni President Ferdinand “Bongbong” Marcos Jr., sang Senate Bill 2507 ukon Negros Island Region Bill agud nga mangin layi.
Sa interview sang Bombo Radyo Bacolod kay Bacolod City Lone District Congressman Greg Gasataya, nagapasalamat ini nga napirmahan na kag nangin layi ang madugay na nga ginahulat sang kadam-an ang pagtukod sang Negros Island Region.
Suno kay Gasataya, nangin historic man ang nasambit nga hitabo bangud madugay na ini nga ginaduso sang mga lideres sang una pa agud mangin isa ka rehiyon ang isla.
Ini agud man mapromote ang mapasanyog kag madevelop ang ekonomiya sa rehiyon.
Suno sa kongresista ang nagconvince sa presidente agud nga pirmahan ang hagna ang kabudlayan sa pagbiyahe agud magtabok sa pihak nga isla agud nga makakuha sang serbisyo sang gobyerno.
Aminado man si Gasataya nga una pa lang nga step ang natapos kag madamo pa sang dapat nga ubrahon agud nga mapatuman ang nasambit nga layi.
Matapos ang 15 ka adlaw kag mapublished na ang layi, magadihon sang Technical Working Group agud nga maestoryahan kag maplastar ang tanan agud nga mapatuman ang Republic Act (RA) 12000 ukon ang NIR Act.
Ginpahayag naman sini nga sa bersyon sang Senado sa nasambit nga layi, nakapagkit naman kun sa diin pagatukuron ang mga regional government offices sa Rehiyon.
Bangud sa layi ang mga pumuluyo sa isla ang indi na mabudlayan sa pag-avail sang serbisyo sang gobyerno.
