Ginpamatian ni Bacolod City Lone District Congressman Greg Gasataya ang sentimyento sang Social Action Center sa pagpanguna ni Fr. Chris Gonzales kag pila ka pamatan-on matapos magpautwas paagi sa protesta angot sa anti-terrorism bill of 2020 kahapon sang aga.
Sa interview sang Bombo Radyo Bacolod kay Gasataya, ginpahayag sini nga nagpatawag ini sang virtual conference agud pamatian ang mga concerns sang mga pamatan-on angot sa hagna.
Ginpahayag man ni Gasataya nga ginpaathagan na sang talatapan sini ang mga kabataan angot sa pagpungko sini kag pagboto nga affirmative apang may yara sang mga reservations angot sa masunod nga butang sa pagkonsiderar sang bicameral conference committee ukon promulgation sang Implementing Rules and Regulations sang legislation.
Ginpahayag man ni Gasataya nga dapat mahatagan sang kaathagan ang mga provisions agud macoincide ukon magsanto sa rules of court kaangay sang warrantless arrest.
Suno sa kongresista, ang hagna ang wala lang naintindihan gani mas maayo nga mabasa ini kag mahangpan sangsa magpamati lang sang ginahambal sang mga tawo.
Kun ang hagna ang interpretahon sang maayo, wala ini nagakahulugan nga indi na mahimo mag-exercise sang kinamatarong ang isa ka Pilipino.
