Very grateful si Bacolod City Lone District Rep. Greg Gasataya nga napilian ini bilang miyembro sang gamhanan nga Commission on Appointments.
Santo sa Konstitusyon, gamhanan ang CA bangud ini ang nagaconfirm ukon nagabasura sang ad interim appoinment sang presidente sa isa ka Cabinet secretary kag iban pa nga appointed officials.
Sa interview sang Bombo Radyo kay Gasataya, ginpaathag sini nga pagkatapos sang eleksyon, ginapamangkot ang mga kongresista kun ano ang ila preference sa mga komitiba sa Kamara gani nagpangabay ini sa House leadership kag sa Nationalist People’s Coalition sa posibilidad nga mangin miyembro sang CA kag naghulat-hulat tubtub kahapon, napilian si Gasataya bilang miyembro sang gamhanan nga CA.
Suno kay Gasataya, may yara sang 310 ka miyembro sang Kamara subong nga Congress kag 12 lang ang mangin miyembro sang commission on appointments nagikan sa Kamara, santo sa nakabutang sa Konstitusyon.
Aminado si Gasataya nga madamo ang miyembro sang Kongreso nga luyag nga mangin miyembro sang Commission on Appointments, apang indi tanan ang mahatagan sang kahigayunan nga mangin katapo sini bangud 12 lang ang pwede, samtang 12 man ang nagikan sa Senado.
Suno sa kongresista, dako ini nga butang para sa iya bangud indi malipod nga dako nga porsyento sang senior members sang Kamara ang sarang nga mangin kabahin sang komitiba.
