Magasugod na subong nga adlaw ang pagbaton sang Bacolod sang mga locally stranded individuals ukon returning residents nagikan sa nagkalain-lain nga bahin sang pungsod.
Sa interview sang Bombo Radyo kay Councilor Cindy Rojas, chairman sang action team on non-returning residents sa ciudad, ginkumpirmar sini nga subong nga adlaw may yara na sang flights ang Philippine Airlines apang gin-athag sini nga mga LSI lang sang Bacolod City ang pahanugutan nga magbyahe.
Ini bangud sa ginpadala nga hingyo ni Governor Eugenio Jose “Bong” Lacson nga isa ka semana nga moratorium para sa mga Negrense OFW, LSI kag returning residents.
Suno kay Rojas, nagpahibalo na sila kay Lacson nga magasugod pauli ang mga LSI sa ciudad kag wala man sang problema sa gobernador nga sa Bacolod-Silay Airport ang mga ini maagi.
Wala pa man nakahibalo ang konsehal kun pila kabilog ang masakay apang yara sa 50-70 ka mga Bacolodnon ang ila ginalauman.
Aminado man ini nga ila na nga ginalauman ang sige-sige nga pagpapauli sa mga returning residents bangud isa ka bulan man nga nastranded kag natipon ang mga ini sa Metro Manila kag iban pa nga bahin sang pungsod.
