Ginalauman sang syudad sang Bacolod ang pag-abot sang dugang nga alokasyon nga 15,000 doses sang Sinovac vaccine subong nga aga.
Suno kay Bacolod City Administrator Em Ang, Executive Director sang Emergency Operation Center, sa 15,000 doses nga maga-abot, sarang naman ini nga makabakuna sang 7,500 nga mga Bacolodnon para sa duha ka doses.
Paathag pa sang City Administrator nga pabalik-balik man sa pagrequest si Bacolod City Mayor Evelio Leonardia sang dugang pa nga alokasyon sa National Government.
Kasubong man nga nagrequest ang alkalde pinaagi sa Region 6.
Samtang ginpakigbahin man ni Ang nga nakaschedule na sa pag-inspeksyon ang Department of Health (DOH) sa ultra low freezer nga ginbakal sang syudad bwas.
Suno kay Ang, matapos sang inspeksyon, amo palang mapadal-an sang Pfizer vaccine ang syudad sang Bacolod.
Apang pasalig naman sini nga may naka-alukar na nga 5,850 doses sang Pfizer vaccine para sa mga Bacolodnon nga ginabanta mabatun sang syudad subong nga semana.
Ginpakigbahin man ni Ang nga sa meeting kahapon sang mga alkalde kag gobernador sa Region 6 upod si DOH Assistant Secretary Roy Ferrer, nga ginpaathag naman sini nga A1, A2 kag A3 palang sa karun ang ginapahanugutan nga mabakunahan sa Western Visayas kag wala pa malakip ang mga A4 categories.
Ini ang kasunod sang mga nagalapta na nga balita sa social media kun sa diin nagapatigayon na sang vaccination rollout sa A4 sector ang Metro Manila.
Suno diri wala pa sang alokasyon ang rehiyon nga bakuna nga natalana para sa A4 sector nga mga frontliners kag essential services workers.
