Ginpahayag sang chairman sang inter-agency task force against coronavirus sa ciudad sang Bacolod nga magahingyo ini sa Sangguniang Panlungsod nga magpasar sang resolusyon nga naga-apelar sa national government nga magpatigayon sang “proper coordination” antes magpadala sang mga repatriated OFWs.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga tinguhaan nila nga magpasar sang amo nga resolusyon agud nga mahatagan sang solusyon ang ila karon nga problema kun sa diin gulpiyada nalang mapapauli ang national government sang mga repatriated OFWs nga taga-Bacolod nga wala man sang sang husto nga koordinasyon.
Suno sa bise alkalde, luyag lamang sang city government nga mapahibalo sang mas timprano kag may yara sang coordinated nga tikang sa tunga nila kag sang mga imbolbado nga ahensya agud makapreparar sila.
Dugang pa ni Familiaran, first come, first served dapat ang basehan sa pagpapauli sa mga ini.
Nagalaom naman ang bise alkalde nga amo man ini ang sundon sang Overseas Worker’s Welfare Asscociaton kag sang Maritime Industry Authority.
Ginpasiguro man sini nga handa gid ang ciudad nga batunon ang tanan nga mga returning residents sini apang kuntani indi man sila pag-ibutang sa alang-alang nga sitwasyon.
